Главные новости Джангельдинского района – Qostanai Media

Қазақстан халқының бірлігі күні мерекесіне байланысты орталық алаңда мекеме, кәсіпорын қызметкерлерінің қатысуымен кең көлемде іс-шара ұйымдастырылды

Өнер десе, жан – тәнімен бірге беріліп кететін Торғай халқы ынтымақ пен бірлік күнін көтеріңкі көңіл – күймен қарсы алды. Әсіресе, әр ұлттың киімін киіп, ұлттық тағамдары мен өнерлерін насихаттаған мекеме ұжымдары тамаша кештің шырайын ашты. Тіпті, кейбірі әр ұлтқа тән қасиетті өнерін көрсетіп, би билеп, ән салды. Енді бірі сол өзге ұлт өкілдерінің тілімен құттықтауларын жолдады. Өнерлі ұжымдарға аудан әкімі алғысын білдірді. Дала сахнасында мекеме ұжымдарының қатысуымен мерекелік концерт өтті. Аудан әкімі Шота Оспанов торғайлықтарды айтулы мерекемен құттықтады.

– Бейбітшілік пен тұрақтылық және ұлтаралық келісім–мемлекетіміз-дің ең басты негізі, рухани байлығы. Қазақ – қашаннан бауырмал халық. Әр кезеңде елімізден пана іздеп келген өзге ұлт өкілдерінің бәріне құшағын ашып, төрінен орын беріп, қандай қиын сәттердің өзінде бір үзім нанды бөліп жеген елміз. Қаймағы бұзылмаған қазақ жері бүгінде көпұлтты мемлекеттің бірі болып, әлемге бейбіт сүйген ел ретінде танылды. Қоғамдық келісім мен саяси тұрақтылық біздің ең маңызды байлығымыз болғандықтан, бұл жетістікті бағалап, оны сақтау жолында аянбай еңбек ету – әрбір Қазақстан азаматының міндеті. Сіздерді бүгінгі мерекемен құттықтай отырып, елдегі татулық пен бірлігіміз бекем болсын деп тілеймін. Алға қойған арман-мақсаттарға ауызбіршілікпен жете берейік, – деді аудан әкімі.

Мерекелік шара барысында спорттық ойныдар өтіп, жеңімпаздар анықталды. Сонымен қатар, Жаркөл, Ақшығанақ, Қалам – Қарасу ауылдық округтері мен Торғай, Сужарған, Шеген ауылдары арзандатылған бағада ауылшаруашылық жәрмеңкесін өткізді.

Байбатыр НИЯЗБЕКҰЛЫ