Мектеп түлектерін Ұлттық бірыңғай тестілеуге сапалы дайындауға бағытталған «AI Мектеп» жобасына Жангелдин ауданындағы Ахмет Байтұрсынұлы атындағы екі мектеп қосылды.
Жоба Ахмет Байтұрсынұлы атындағы Қостанай өңірлік университеті жанынан жүзеге асырылып, 5 қазаннан бастап жұмысын бастайды.
Жобаның басты ерекшелігі – дәстүрлі оқыту мен жасанды интеллект мүмкіндіктерін бір жүйеге біріктіру. Жангелдин ауданындағы Ахмет Байтұрсынұлы атындағы екі мектептің биылғы түлектері арнайы платформа арқылы толықтай тегін білім ала алады.
Оқу екі бағытта ұйымдастырылады. Біріншісі – офлайн дайындық. Оқушылар аптасына екі рет, екі сағаттан сабаққа қатысып, тәжірибелі пән мұғалімдерінен ҰБТ-ға дайындықтан өтеді. Сабақ барысында тест тапсырмалары талданып, оқушылардың біліміндегі олқылықтарды анықтау және толықтыру жұмыстары жүргізіледі.
Екінші бағыт – онлайн дайындық. Арнайы әзірленген платформада «AI Ахмет» жасанды интеллект құралы оқушыға бағыт-бағдар беріп, өздігінен жұмыс істеуіне мүмкіндік жасайды. Оқушы оқу материалдарын меңгеріп, тапсырмаларды орындап, білім деңгейін жетілдіре алады.
Ахмет Байтұрсынұлы атындағы Қостанай өңірлік университетінің академиялық мәселелер жөніндегі проректоры Эльмира Наурызбаеваның айтуынша, жобаның мақсаты – оқушыларды тек ҰБТ-ға дайындау ғана емес, олардың өздігінен білім алу дағдысын қалыптастыру.
– «AI Мектеп» жобасы арқылы тәжірибелі мұғалімнің қолдауын жасанды интеллект мүмкіндіктерімен ұштастырамыз. Оқушы сабақта алған білімін платформа арқылы бекітіп, өзіне қажетті тақырыптарды қосымша меңгере алады, – деді Эльмира Наурызбаева.
Жобаға басқа мектеп оқушылары да қатыса алады. Олар үшін оқу ақылы негізде жүргізіледі: бір сабақтың құны – 15 мың теңге, ал айлық пакет – 60 мың теңге. Сонымен қатар оқу сауаттылығы бойынша платформадағы дайындық тегін ұсынылады.
Жобаны әзірлеуге университет оқытушылары мен студенттері атсалысқан. «AI Мектеп» бір оқу жылымен шектелмей, алдағы уақытта да жалғасын табады деп жоспарланып отыр.
Осылайша, Жангелдин ауданындағы Ахмет Байтұрсынұлы атындағы екі мектептің түлектері заманауи цифрлық мүмкіндіктерді пайдалана отырып, ҰБТ-ға жаңа форматта дайындалуға мүмкіндік алады.
Шұға ҚОҢҚАБАЙ
Ғасырлық тарихы бар білім ордасынан академиктер, ғалымдар мен елге танымал қаламгерлер түлеп ұшқан. (далее…)
Жангелдин ауданында медицина саласындағы кадр тапшылығы өзекті мәселелердің бірі болып отыр. (далее…)
Әлеуметтік осал отбасылардың үйлеріне газ және түтін датчиктері орнатылуда. (далее…)
Бала күні кеше ғана үлкен өмірге қадам басып, ақ халат киюді армандаған жас жеткіншектер бүгінде…
Аймақ басшысы Құмар Ақсақалов Жангелдин ауданына жұмыс сапарымен барып, Торғайдағы тұрғын үй құрылысы, абаттандыру және…
Жангелдин ауданында жыл басынан бері қаржылық алаяқтық бойынша бір қылмыстық іс тіркелген. (далее…)
This website uses cookies.