Главные новости Джангельдинского района – Qostanai Media

Бала балуан ел намысын қорғап жүр

Тәуіш ауылындағы Қаратүбек жалпы білім беретін мектебінің оқушысы Данияр Қабен қазақ күресімен 9 жасынан бастап айналысып келеді.

Арманына жету үшін мектеп жанындағы күрес бөліміне тізіліп, қазақ күресінің қыр – сырын меңгеруге бел буады. Жаттықтырушысы Медет Қарпықов оның көзінен от ұшқынын байқап, тәрбиелейді. Аудандық жарыстарға қатысып, жүлделі оралмаса да түбі жеңіске жетемін деп талпынған Данияр алған бетінен қайтпайды. Сөйтіп жүріп, біртіндеп жеңіске жете бастады.

«Данияр 9 жасынан қазақ күресін меңгеріп, ерік-жігерінің арқасында облыстық, республикалық турнирлердің жеңімпазы атанды. Тіпті осы қаңтар айындағы облыстық чемпионаты турнирінен жүлделі 3-ші орынды иеленді. Жарыс кезінде қарсыласына кек сақтамай, сәттілік тілеп жүреді. Мен үйрететін әдіс-тәсілдерді тез ұғынып, өзінен кіші әріптестеріне үйретіп, бағыт-бағдар береді. Осы күнге дейін талмай еңбек еткені мен жеңіске деген ынтасының әсерінен көптеген турнирлерден жүлделі орындармен оралды. Даниярды мақтан тұтамын, сондай-ақ алда алар асулары көп екеніне сенемін»,-дейді бапкері.

Жас жігерінің арқасында 2 белбеуі, 2 кубогы, 26 медальдары мен марапатталған.

Жас балуанның «Әлем Барысына» қатысу арманға айналды. Тынымсыз дайындықтың арқасында оған жетемін деген жігерін жанып келеді.Тәуіш ауылының жас жеткіншектерін қазақ күресіне баулып, бапкеріне ұқсайтын тұлға болу арманы. Данияр сынды осы дәстүрді жалғастырып, қазақ күресін әлемге танытуға атсалысатын жандар көп болғай.

Байбатыр АХМЕТБЕКОВ