Жанкелдин ауданының өнерпаздары облыс орталығында өнер көрсетті

Торғайлық өнерпаздардың тартуы

Қостанай қаласының «Жастар» сарайында Міржақып Дулатұлының 140 жылдығына орай, торғайлық өнерпаздардың ұйымдастыруымен «Туған жер үні» атты концерттік бағдарлама көрермендер назарына ұсынылды.

Торғай топырағынан нәр алып, киелі жерде өсіп өнген ел перзенттерінің, жырақта болса да елмен үнемі тығыз байланыста жүретін өнерпаздардың тоғысқан күні болды. Торғайдың ыстық сәлемін аңсай келген қостанайлық жерлестер ерекше қошеметпен құрмет көрсетіп, рухани демалып қайтты. Аталмыш концерт наурыз айында «Торғайдан сәлем» атты атаумен Астана қаласында өткен болатын. Алдымен қонақтарға қазақы дастархан жайылып, дәм ұсынылды. Сахна шымылдығы Торғай жерінен шыққан тұлғалар жайлы дайындалған бейне көрсетіліммен ашылды. Н.Ахметбеков атындағы мәдениет үйі жанынан құрылған «Халық театр» әртістері «Туған жерге сағыныш» прологын көрермендер назарына ұсынды. Торғайдың әр перзенті дарынды. Б.Хамзин атындағы өнер ордасынан түлеп ұшқан төл перзенттері қазіргі таңда өнерден ойып алар орны бар өнер иелеріне айналды. Торғай сахнасында өнерге енді қадам басып, талай байқауларда елдің атын танытқан жас өнерпаздар, аталмыш концертте төбе көрсетіп, аудан әкімінің қолдауымен арнайы келді. Концертте елдің әр түпкірінде жүрген өнерпаздары бас қосып туған жерге деген сағыныштарын әсем әнмен көрермендердің жүректеріне жеткізе білді. Көптің сұрауымен «Ару қалам Қостанай» әнін, әннің авторы, Қазақстан Республикасының еңбек сіңірген мәдениет қызметкері, Қостанай облысы компазиторлар Одағының мүшесі жерлесіміз Бақытжан Сәуекенов киелі сахна төрінде орындап, көрермендер қосыла шырқады

Кеш соңында аудан әкімінің атынан ықылас гүлі тарту етілді. Облыстық мәдениет басқармасы басшысының орынбасары Саят Жүсіпов жылы лебізін арнап, ризашылығын жеткізді. Қостанай облысы әкімінің алғыс хатын, Фариза Жоламанова, Дилара Қарекенова, Ражановтар отбасына табыстады. Облыстық мәдениет басқармасының алғыс хатымен Әділ Ақанов, Жәуке Оңдаған, Перизат Қалабайқызы марапатталды.

Аудандық мәслихат төрайымы Анар Ержігітова құттықтау сөз сөйлеп, елдің өнерін қолдай келген барша көрерменге алғысын білдірді. Аудан әкімі атынан «Жастар» сарайының басшысы Бағдат Оспановқа алғыс хат табыстады. Елге деген сағыныштарын басып, әуезді ән кешінен рухнаи демалыс алған көрермендер естелік суретке түсіп тарқасты.

Аягөз ФАЗЫЛБЕКҚЫЗЫ