Главные новости Джангельдинского района – Qostanai Media

Тасқын судан зардап шеккен аудандардың бірі әрі күрделісі Жанкелдин ауданы болып саналады.

Қаншама елді мекендер су астында қалды. Мал шығыны әлі күнге анықталуда. Су басу қауіпі сейілген ауыл тұрғындары отбасыларымен қауышты. Үйлерін су шайып кеткен кейбір ауылдық ағайындар уақытша киіз үйлерді паналап отыр. Қарқыны қатты тасқын судың зардабы облыстық, аудандық маңызы бар жолдарды жырып, көлік қатынасы кілт тиылды. Бұған дейін су ортасында қалған ауылдарға тікұшақпен азық – түлік жеткізілген еді. Жергілікті билік өкілдері тұрғындардың талабын ескеріп, Шұбалаң – Қарасу жолын уақытша қалыпқа келтіру жұмыстарын бастап кетті. Ағымдағы жөндеу жұмыстарына аудандық бюджеттен 27 млн теңге бөлінген. Мердігер Қостанай ауданынан «Казтрансжол» және Рудный қаласынан келген «Танар» жауапкершілігі шектеулі серіктестігі.

-Шұбалаң – Қарасу бағытындағы көтерме жолды 30 жерден жырып кеткен. Шұбалаң – Көкалат – Көлқамыс ауылына дейін қалыпқа келтіру жұмыстары жалғасады. Мердігер жергілікті жердегі камаз автокөлігі бар азаматтарды жалдау мақсатында жұмыспен қамтуда. Су беті қайтып, жер құрғағасын барлық жолдарды талапқа сай жөндейтін боламыз. Ол үшін республкалық, облыстық, аудандық бюджеттен тиісті қаржы бөлінетін болады. Сметалық құжаттарды дайындап, нақты қажет қаражатын анықтап, жоғары жаққа ұсыныс береміз. Ал, әзірге көлік қатынасын тоқтатпас үшін уақытша жөндеу жұмыстары жасалынып жатыр, – дейді аудандық ЖҚХ бөлімінің басшысы Серік Айтқұлов.

Жол қатынасы үзілгелі айға жуық уақыт болды. Торғай – Арқалық бағытындағы тас жолды қалыпқа келтіру үшін жұмыстар жасалуда. Бүгінгі күні жолаушылар мен таксистер Қостанай қаласына Торғай – Шилі арқылы қатынап жатыр.

Байбатыр АХМЕТБЕКОВ