Мереке қарсаңындағы марапат

Еленген еңбек – ер беделі

Жаңа жыл мерекесі қарсаңында аудан әкімі Шота Оспанов ауданымыздың әлеуметтік – экономикасының дамуына үлес қосып жүрген азаматтарға естелік төсбелгі мен медальдарды салтанатты түрде табыс етті.

Аудандық ардагерлер кеңесінің төрағасы Қарсақбай Бірмағанбетұлы “Қазақстан Республикасы “Ардагерлер ұйымы” республикалық қоғамдық бірлестігінің “Құрмет белгісі”  төсбелгісімен марапатталды. Кеңес үкіметі кезінде әр салада қызмет жасап, елдік мәселелердің шешілуіне оң ықпал жасаған қария басшылыққа ризашылығын білдірді.

Ауданымыздың азаматтық қорғау саласындағы табысты еңбегі үшін “Қазақстан Республикасының азаматтық қорғау органдарына 25 жыл” медалімен Серік Сапаров, Аңсаған Әбішев, Асылбек Жұмағали наградталды. Бұл азаматтар өрт сөндіру және төтенше жағдайлар бөлімінде абыройлы еңбек етіп, қызметтік зейнеткерлікке шыққан аталмыш саланың ардагерлері.

Қазіргі таңда әлемге тарап жатқан пандемияға байланысты барлық даталы мерекелерді өткізуге шектеулер қойылды. Сондықтан биылғы жаңа жылды ән – күйсіз, от шашусыз, тіпті мерекенің басты кейіпкерлері Аяз ата мен Қарша қызсыз қарсы алуға тура келіп тұр. Бір дастарханның басында балаларыңыз бен  немерелеріңіздің әсем әнін, тақпақтарын тыңдап, марқайып отырғанға не жетеді. Сиыр жылы тек сый – құрметімен, қуаныш бақытымен, берекелі ырысымен келсін деп тілейік.

Байбатыр АХМЕТБЕК